Gastbangg von weplu

Fern die Wärme

Waisch was das isch, do obe uf däm Foteli?
Es isch s’neuschte Luxushotelservice in Gstaad,
kai Witz, das isch wohr, y bi doch kei Trotteli.
E Magic Box für e warms Zimmer, e heiss Bad.     

Heizoel leicht heisst das Wunder, kai Ofe für Holz,
mit modärnschtem Brenner und Boiler und Pumpe,
‘han y sofort poschtet’, sait dr Hotelier stolz,
umwältfründlig grien, do loss y mi nit lumpe.         

Freywillig hän si nit in Fossils inveschtiert,
d’EBL Färnheizig ischne drum abgsoffe, 
d’Leitig teschte, flicke, alles hän si probiert,
kaputt, e ganzi Wuche isch nüt me gloffe.                                        

Kaviar und Trüffel kasch ha, nur kai Heizig,
5 Stärn, tuusig Stutz für d Nacht, aber schlottere.
Au Luxus Chalets sin kalt, bisch nit der einzig,
dä Ort für d Oberbonze am verlottere!                     

Im Ahang sin d Detail*, y verzell kei Schmarre, 
zerscht hän si gmeint sig d’Röhre, si heig nur e Läck, 
denn umeschwätze, wiene Karre voll Narre, 
dr Wärmiustuscher sigs gsi, er isch voll Drägg!                  

Blockiert, verschtopft, nit greinigt, das isch doch bsoffe,
niemer isch schuld, d Putzfrau sig drum derfo gloffe.       

* Auszüge